कालिन्चोक गा.पा.मा किवी खेती सम्बन्धी दुई दिने तालिम सम्पन्न

थाङ्मीचागु सम्बादाता

१३ पुष शनिबार २०८१

सन्तोष ठान्टी थाङ्मी

कालिन्चोक गाउँपालिका वडा नं. १ क्याम्पोलमा किवी खेतीलाई प्रोत्साहन गर्न आयोजित दुई दिने तालिम सफलतापूर्वक सम्पन्न भएको छ। नामसालिङ सामुदायिक विकास केन्द्र र कालिन्चोक एकीकृत सामुदायिक विकास केन्द्रद्वारा सञ्चालित एकीकृत सामुदायिक विकास परियोजनाअन्तर्गत भित्रिखर्क किवी उत्पादन पकेट क्षेत्रका ८ कृषक समूहका २५ जना किसानको सहभागितामा तालिम सम्पन्न भएको हो।

प्रधानमन्त्री कृषि आधुनिकीकरण परियोजना कार्यान्वयन एकाइ रामेछापका कृषि प्राविधिक सञ्जीव केसीको नेतृत्वमा भएको तालिममा किवी खेतीको काटछाँट र कलमी सम्बन्धी सैद्धान्तिक र प्रयोगात्मक ज्ञान प्रदान गरिएको थियो। तालिमका क्रममा किसानहरूले किवी खेतीलाई थप उन्नत र व्यावसायिक बनाउन आवश्यक सीपहरू सिकेका थिए।

तालिमको दोस्रो तथा अन्तिम दिन आयोजित समापन कार्यक्रममा कालिन्चोक गा.पा. वडा नं. १ का अध्यक्ष पदम थामीले किवी खेतीको महत्त्वलाई जोड दिँदै यसको व्यावसायिक विकास र प्रवर्द्धनका लागि स्थानीय निकाय तथा राज्यको ध्यान जानु आवश्यक रहेको धारणा व्यक्त गर्नुभयो। उहाँले किवी खेतीको उत्पादकत्व वृद्धि गर्न र किसानहरूको आम्दानी बढाउन वडा कार्यालयले आवश्यक सहयोग उपलब्ध गराउने प्रतिबद्धता जनाउनुभयो।

तालिमको बारेमा जानकारी दिँदै कृषि प्राविधिक अस्मिता बस्नेतले किवी खेतीमा आधुनिक प्रविधिको प्रयोगले उत्पादनलाई अझ गुणस्तरीय र नाफामूलक बनाउन सकिने बताउनुभयो। उहाँले किसानहरूलाई व्यवसायिक खेतीतर्फ उन्मुख गराउन यस्ता तालिमहरूको महत्त्वपूर्ण भूमिका रहेको बताउनुभयो।

तालिममा सहभागी कृषकहरूले किवी खेतीलाई उन्नत बनाउँदै व्यावसायिक उत्पादनलाई प्राथमिकता दिने र सिकेको ज्ञान व्यवहारमा लागू गर्ने प्रतिबद्धता जनाएका छन्। तालिमले कृषकहरूलाई आत्मनिर्भर बनाउन थप उत्प्रेरणा दिएको छ।

कृषि विकास र किवी खेतीको व्यावसायिकतामा योगदान पुर्‍याउने उद्देश्यले आयोजना गरिएको यो तालिमले किसानहरूको सकारात्मक प्रतिक्रिया पाएको छ।