मलेसियामा रोल्पाली सेवा समाजद्वारा दसैं विशेष कार्यक्रम र जोहोर समिति प्रथम वार्षिकोत्सव भव्य सम्पन्न

जोहोरबारु, मलेसिया ।
रोल्पाली सेवा समाज मलेसियाले आयोजना गरेको दसैं विशेष सांस्कृतिक कार्यक्रम तथा क्षेत्रीय समिति जोहोरको प्रथम वार्षिकोत्सव समारोह उत्साहपूर्ण वातावरणमा भव्य रूपमा सम्पन्न भएको छ।

कार्यक्रमको अध्यक्षता संस्थाका अध्यक्ष तिपेन्द्र बुढा मगरले गर्नुभयो भने प्रमुख अतिथिमा एनआरएनए मलेसियाका अध्यक्ष राकेश प्रसाद महतो, विशिष्ट अतिथिमा राजु योन्जन तामाङ, तथा अन्य अतिथिहरुमा महासचिव बिष्णु बराल, सचिव उमेश कोइरी, मलाकाका अध्यक्ष अर्जुन लावती लिम्बु लगायत विभिन्न संघसंस्थाका प्रतिनिधिहरुको उल्लेखनीय उपस्थिति रहेको थियो।

कार्यक्रममा मलेसियाका स्थानीय नागरिकहरूको समेत सहभागिता रहँदा माहोल थप उत्साहपूर्ण बनेको थियो।

यस अवसरमा नेपाल तामाङ घेदुङ क्षेत्रीय समितिले ‘विवाह संस्कार’ विषयमा नाटकीय प्रस्तुति दिँदै मौलिक संस्कृतिको संरक्षणमा सन्देश दिएका थिए। साथै गायन, नृत्य र हास्य प्रस्तुतिहरुले कार्यक्रममा रमाइलोपन थपेका थिए।

🌸 विशेष आकर्षण

• मौलिक सांस्कृतिक प्रस्तुति
• दसैं विशेष शुभकामना आदान–प्रदान
• सम्मानपत्र वितरण
• रोल्पा जिल्लाका धार्मिक तथा पर्यटकीय स्थलहरूको फोटो प्रदर्शनी

🎯 उद्देश्य

अध्यक्ष तिपेन्द्र बुढा मगरका अनुसार, प्रवासमा रहेका नेपालीबीच दसैं, तिहार र छठ पर्वको अवसरमा आपसी सद्भाव र आत्मीय सम्बन्धलाई अझ मजबुत बनाउन, संस्कार–संस्कृतिको संरक्षण–प्रवर्द्धन गर्न र रोल्पा जिल्लाको प्राकृतिक सौन्दर्य प्रवासी नेपालीबीच प्रचार–प्रसार गर्न कार्यक्रम आयोजना गरिएको हो।

सहभागीहरुले प्रवासमै आफ्ना मौलिक चाडपर्व सम्झाउने खालको यस्तो कार्यक्रम निकै महत्वपूर्ण रहेको प्रतिक्रिया दिएका छन्।