धनगढीमाई मावि स्तरीय कविता प्रतियोगितामा सरस्वती मोडेल सेकेन्डरी स्कूल (कसहा) प्रथम ।।।

थाङमिचागु डटकम संवाददाता

विनोद मण्डल, कार्तिक १५ – महाकवि लक्ष्मीप्रसाद देवकोटाको ११५ औं जन्मजयन्तीको अवसरमा धनगढीमाई नगरपालिकामा आयोजित नगरस्तरीय कविता प्रतियोगितामा सरस्वती मोडेल सेकेन्डरी स्कूल, कसहाले प्रथम स्थान हासिल गरेको छ ।

धनगढीमाई नगरपालिकाको प्राकृतिक अस्पतालको सभाहलमा आयोजित यस कार्यक्रममा मावि स्तरका विद्यार्थीहरूले आफ्ना सिर्जनशीलता प्रस्तुत गर्दै विभिन्न कविताहरू सुनाएका थिए । यो प्रतियोगिता नागरिक संवाद समिति, धनगढीमाईको आयोजनामा सम्पन्न भएको हो, जहाँ समग्र जन उत्थान केन्द्र लाहानलगायत करिब आधा दर्जन संघ-संस्थाहरूको सहयोग रहेको थियो ।

धनगढीमाई–८ स्थित सरस्वती सेकेन्डरी स्कुलका विद्यार्थी पिंकी कुमारी महतोले प्रथम स्थान हासिल गर्न सफल भएकी छन् । यसैगरी, सान्त्वना पुरस्कार समेत सोही विद्यालयका विद्यार्थी निरज कुमार महतोले जितेका छन् ।

विगत लामो समयदेखि धनगढीमाई नगरपालिकाको शैक्षिक वृत्तमा ग्रामीण क्षेत्रका अभिभावकहरूको रोजाइको विद्यालयको रूपमा परिचित यस विद्यालयले अति मनोरम वातावरणमा पठन-पाठन गराइरहेको छ । विद्यालयले विद्यार्थीहरूमा सिर्जनात्मक क्षमता विकास गर्दै समाजलाई आवश्यक जनशक्ति उत्पादन गर्दै आएको स्थानीय समाजसेवीहरू बताउँछन् ।

विद्यालयका प्रिन्सिपल विष्णु न्यौपानेको अशल प्रशासनिक व्यवस्थापनका कारण विद्यालयले प्रतिस्पर्धात्मक जनशक्ति उत्पादन गरिरहेको आम बुझाइ रहेको पाइन्छ ।