८ मङ्गलबार असोज २०८१

थाङ्मिचागु डट कम संवाददाता

कालिञ्चोक वडा नं. १ का अध्यक्ष पदम आक्यामी थामीको अध्यक्षतामा एकदिने पोषण शिक्षा तालिम सफलतापूर्वक सम्पन्न

कालिञ्चोक, दोलखा — कालिञ्चोक एकीकृत सामुदायिक विकास केन्द्र र नामसालिङ सामुदायिक विकास केन्द्रको सामाजिक तथा प्राविधिक सहयोग तथा नर्वे विकास कोषको आर्थिक सहकार्यमा एकदिने पोषण शिक्षा तालिम भव्य रूपमा सम्पन्न भएको छ। यस तालिमको उद्देश्य स्थानीय समुदायलाई पोषण सम्बन्धी जानकारी प्रदान गर्दै उनीहरूको स्वास्थ्यमा सुधार ल्याउनु थियो। तालिममा स्वास्थ्य चौकीका इन्चार्ज रूपेस राय यादवले पोषणका महत्त्वपूर्ण विषयहरूबारे प्रशिक्षण दिएका थिए। उनले विशेष गरी समुदायमा हुने पोषणसम्बन्धी समस्याहरू र समाधानका उपायहरूबारे विस्तृत जानकारी दिए।

तालिमको अध्यक्षता कालिञ्चोक वडा नं. १ का अध्यक्ष पदम आक्यामी थामीले गरेका थिए। कार्यक्रमको औचित्यबारे परियोजना जिल्ला संयोजक राजन क्षेत्रीले उद्घाटन मन्तव्य राख्दै तालिमले पोषणमा मात्र नभई स्वास्थ्य र समग्र समुदायको विकासमा सकारात्मक प्रभाव पार्ने अपेक्षा व्यक्त गरे। कृषि प्राविधिक अस्मीता बस्नेतले कृषि र पोषणको अन्तरसम्बन्धबारे जानकारी दिँदै पोषणयुक्त आहारको महत्त्व, स्थानीय उत्पादनको उपयोग, र खानपानमा विविधताको आवश्यकताबारे प्रकाश पारेकी थिइन्।

तालिममा कुल २५ जना सहभागी रहेका थिए, जसमा १५ जना महिला स्वास्थ्य स्वयंसेविका र अन्य १० जना अगुवा कृषकहरूको सहभागिता रहेको थियो। सहभागीहरूले तालिमबाट प्राप्त ज्ञानलाई व्यवहारिक रूपमा प्रयोग गर्दै आफ्नो समुदायको पोषण तथा स्वास्थ्य सुधार गर्न भूमिका निर्वाह गर्ने प्रतिवद्धता जनाएका थिए। सहभागीहरूले तालिमबाट पोषणसम्बन्धी ज्ञानको स्तर बढाएको र यसलाई व्यवहारमा कसरी लागू गर्ने भन्ने कुरा सिक्न पाएको बताए।

तालिमको समापनमा अध्यक्ष पदम आक्यामी थामीले पोषण र स्वास्थ्यका तालिमहरूले समुदायमा लामो समयसम्म सकारात्मक प्रभाव पार्ने र यसले समुदायको समृद्धिमा महत्वपूर्ण योगदान गर्ने कुरा बताए। उनले सहभागीहरूलाई पोषणको महत्त्वलाई दैनिक जीवनमा लागू गर्न र आफ्नो परिवार तथा समाजलाई पनि यो ज्ञान पुर्याउन आह्वान गरे। साथै, आगामी दिनमा यस्ता तालिमहरूलाई निरन्तरता दिने प्रतिबद्धता व्यक्त गर्दै उनले स्वास्थ्य र कृषि क्षेत्रलाई सँगै अगाडि बढाउनुपर्ने आवश्यकता पनि औंल्याए।

समग्रमा, यस तालिमले स्थानीय समुदायमा पोषण र स्वास्थ्यप्रतिको सचेतना अभिवृद्धि गर्दै दीर्घकालीन विकासमा सकारात्मक प्रभाव पार्ने अपेक्षा गरिएको छ।