“नेम्बोको देशेङा यादुमीको सारे”

थाङ्मीचागु डटकम सम्बादाता २५ भदौ २०८१

डम्बर थामी ‘अनुपम’ दोलखा कालिञ्चोक गा,पा, ६ पहिलो खण्ड:
राडेपाडे बदलईसा संकल्प चाबुतोले
महाअभियानङा याङादु
गाइ दिका अथक यात्रीकाई
हाराहोई माथाङालिबी
दिगोरे पासपोर्टको मूल्या
दलालनामा मोलमोलाइ नोङ्तोले
पेर्ताले याङान नेम्बोको राडेङा

दोश्रो खण्ड:
तो ज्योकिदु मरुभूमिङा कोन्टे तिरिसिक्ङालिबी
लुङ्गुरीङा निथेकै देशेको लुङ चाबुतुङ्ले
कुताले रापिलको लौरो तिरिसिक्ताले जेतते याङान
कुताले नुईको जहाजङा लुन्ताले जेतते याङान
कुताले आपाको टेक्दु दौरा ङा
आमाको टेक्दु डाम्सी लुङ्गुरीङा नातुङ्ले जेतते याङान
कुताले साहुको काटा च्याताले जेतते याङान
त्याङ कापु कडेङ्ते पचास डिग्रीको उनी चाबुतुङले
कमयुनुङ उछिन्चै आकुस्या
ङा, महिनैपिच्छे ठोहुनुङ देशे चिमोसाकाई रेमिटेन्स

तेस्रो खण्ड:
तोङा बे गाइ उनी षारापाली
कोईकाई उलाम उलामङा चावायङ्दु निहुनुङ
कोईकाई कारखानाङा मिसिन उनी वासियङ्दु निहुनुङ
कोईकाई तार्‍यावारा उनी महलपालीङा
आमे उनी तुर्लुङा ईसिताले सिसा पुपुयङ्दु निहुनुङ
कोईकाई दमे रोप्सा थाले होइ आहुम आहुनेङ्दु निहुनुङ
कोईकाई कृषि फार्मदुङ्ङा जेत नोङ्नोङै तामेङ्दु निहुनुङ
कोईकाई खबुस च्याताले बेडे जायङ्दु निहुनुङ
कोईकाई सिंगमरमरको बुई पुपुदु निहुनुङ
कोईकाई समुद्राको पोलेङा थादु ग्यास प्लान्टङा
जिन्दगी दाउङा नातोले जेत नोङेङ्दु निहुनुङ
कोईकाई स्या फाक्स्या फार्मपालिङा
स्याक्लीनामा लत्पतेईसिताले जेत नोङेङ्दु निहुनुङ
कोईकाई साहुको नेमते नजरबन्द उनी माङ चाबुतोले
उनी टाहे माआमीमारा जेत नोङेङ्दु निहुनुङ

अन्तिम खण्ड:
ए ! रेमिटेन्से देशे टाहुनादु सरकार
ए ! नौजवानपालिको पसिनाते राजनीति नोङुनादु सरकार
ए ! स्वरोजगारको नारा आर्टिक्ताले माक्वास्नादु सरकार
ए ! देशेकाई सिंगापुर उनी जुक्सा ङाहुनादु सरकार
कावानी जेतपाली निथेकै देशेते ईखालाम्का बे
कावानी नेम्बोको देशेङा उनी जेत नोङ्कोनीका बे
हाराकाई माबनैथ्यो निको देशे होई?