नवलपरासीमा ५ लाख ३८ हजार रुपैयाँ बराबरका अवैध सामान बरामद ।।।

विनोद अविरल, परासी, साउन २३ । जिल्ला प्रहरी कार्यालय नवलपरासी (बर्दघाट–सुस्ता पश्चिम) ले जिल्लाका विभिन्न स्थानमा गरेको चेकजाँचका क्रममा करिब ५ लाख ३८ हजार रुपैयाँ बराबरका अवैध तथा भन्सार छलीका सामान बरामद गरेको छ ।

प्रहरीका अनुसार चेकजाँचका क्रममा चिज, मटर, बिस्कुट, नरिवल, मेवा, नदीजन्य सामग्री, लसुन, घाँसको बीउ, चिनी, सुर्ती, साडी, सुटको कपडा लगायतका विभिन्न सामान बरामद गरिएको हो ।

त्यसैगरी, भारतीय नम्बर प्लेटको मोटरसाइकल तथा ट्रलीसहितको ट्र्याक्टर समेत प्रहरीले नियन्त्रणमा लिएको जनाएको छ ।

बरामद गरिएका सबै सामान आवश्यक कानुनी कारबाहीका लागि महेशपुर भन्सार कार्यालय, नवलपरासी (बर्दघाट–सुस्ता पश्चिम) पठाइएको जिल्ला प्रहरी कार्यालयले जनाएको छ ।

प्रहरीले सीमा क्षेत्रमा हुने भन्सार छली तथा अवैध ओसारपसार नियन्त्रणका लागि चेकजाँचलाई थप कडाइ गर्ने जनाएको छ ।