सर्वोच्च अदालतले सरकारी कामकाजमा ‘जनयुद्ध’ शब्द प्रयोग नगर्न आदेश

थाङमिचागु डटकम संवाददाता

सर्वोच्च अदालतले सरकारी कामकाजमा ‘जनयुद्ध’ शब्द प्रयोग नगर्न आदेश दिएपछि अब सरकारी दस्तावेज र कामकाजमा यो शब्द प्रयोग गर्न रोक लागेको छ। अधिवक्ता ज्ञानेन्द्रराज आरणले संघीय सरकार र मधेस प्रदेश सरकारका बजेट वक्तव्यमा यो शब्द प्रयोग भएको देखाउँदै रिट दायर गरेका थिए।

सर्वोच्चको संवैधानिक इजलासले उक्त रिटमाथि सुनुवाइ गर्दै ‘जनयुद्ध’ शब्द नेपालको संविधानको प्रस्तावना र धारा ४२(५) को मर्मविपरीत भएको ठहर गरेको हो। अदालतले ‘जनयुद्ध’ शब्द हटाएर ‘सशस्त्र संघर्ष वा सशस्त्र द्वन्द्व’ जस्ता शब्द प्रयोग गर्न अन्तरिम आदेश दिएको छ।

यसले नेपालको संवैधानिक मर्म र राजनीतिक भाषा प्रयोगमा थप स्पष्टता ल्याउने अपेक्षा गरिएको छ। अदालतको यो निर्णयले सरकारी दस्तावेजमा संवेदनशील र विवादास्पद शब्दावलीको प्रयोगलाई पुनः मूल्याङ्कन गर्न दबाब दिने देखिन्छ।