१० कम्युनिष्ट पार्टीहरूको ऐतिहासिक एकता राष्ट्रिय सम्मेलन सम्पन्न  प्रचण्ड संयोजक, माधव नेपाल सह–संयोजकमा सर्वसम्मत चयन

थाङमिचागु डटकम संवाददाता

काठमाडौँ, कार्तिक १९ ।
क्रान्ति, परिवर्तन र संघीय लोकतान्त्रिक गणतन्त्रको प्राप्तिमा निर्णायक भूमिका निर्वाह गरेका कमरेड माधवकुमार नेपाल, कमरेड झलनाथ खनाल, कमरेड वामदेव गौतम लगायत अग्रज नेताहरूको पहलमा १० कम्युनिष्ट पार्टीहरूको ऐतिहासिक एकता राष्ट्रिय सम्मेलन भव्य रूपमा सम्पन्न भएको छ।

सम्मेलनले नेकपा (माओवादी केन्द्र) का अध्यक्ष **श्रद्धेय कमरेड पुष्पकमल दाहाल ‘प्रचण्ड’**लाई संयोजक तथा नेकपा (एकीकृत समाजवादी) का अध्यक्ष श्रद्धेय कमरेड माधवकुमार नेपाललाई सह–संयोजकमा सर्वसम्मत रूपमा चयन गरेको घोषणा गरेको छ।

यस ऐतिहासिक एकतासँगै नेपाली वाम आन्दोलनले पुनः एकजुट भएर समाजवाद निर्माणतर्फ अघि बढ्ने दृढ सङ्कल्प गरेको छ।
सहभागी सबै दलहरूले “सिङ्गो कम्युनिष्ट केन्द्र निर्माण गरी समाजवादको दिशामा दृढ नेतृत्व प्रदान गर्ने” सामूहिक प्रतिवद्धता व्यक्त गरेका छन्।

कार्यक्रममा वाम नेताहरू र कार्यकर्ताहरूको उत्साहजनक सहभागिता देखिएको थियो।
प्रचण्डले भने —

“आजको यो एकता क्रान्तिकारी इतिहासको नयाँ अध्याय हो। अब समाजवाद र जनताको सपना साकार पार्ने दिशामा सबै एकसाथ अघि बढ्नेछौँ।”

त्यसैगरी माधव नेपालले जोड दिँदै भने —

“कम्युनिष्ट आन्दोलन नेताहरूको होइन, जनताको बलमा टिकेको आन्दोलन हो। अब सामूहिक नेतृत्व र जिम्मेवारीको संस्कृतिद्वारा देशलाई स्थायित्व, समृद्धि र न्यायको बाटोमा अघि बढाउनेछौँ।”

राजनीतिक विश्लेषकहरूका अनुसार, यो एकता नेपाली वाम आन्दोलनको पुनः एकीकरण र देशमा स्थायित्व तथा समाजवादी दिशाको नयाँ सम्भावनाको ढोका खुलेको ऐतिहासिक कदम हो।