धुलिखेलमा प्रथम बृहत् सोनाम ल्होछार २०८१ भव्यताका साथ सम्पन्न

[सन्तोष ठान्टी थाङ्मी]

धुलिखेल, माघ १७, थाङ्मीचागु डटकम — तामाङ समुदायको महान् पर्व सोनाम ल्होछार २०८१ काभ्रेको धुलिखेल-१२, संखुपाटी चौरमा भव्य रूपमा सम्पन्न भएको छ। कार्यक्रमले तामाङ समुदायको मौलिक संस्कृति, परम्परा, र पहिचानलाई उजागर गर्दै सांस्कृतिक विविधताको अनुपम झल्को दिएको छ।

प्रमुख र विशिष्ट अतिथिहरूको गरिमामय उपस्थिति

कार्यक्रमको उद्घाटन नेपाल विद्युत प्राधिकरणका कार्यकारी निर्देशक कुलमान घिसिङले परेवा उडाएर र वरिष्ठ हाँस्य कलाकार हरिवंश आचार्यले छयुमी बालेर गर्नुभएको थियो। उद्घाटन समारोहले तामाङ समुदायको सांस्कृतिक र धार्मिक पक्षलाई विशेष महत्व दिएको थियो।

धुलिखेल नगरपालिकाका नगर प्रमुख अशोक कुमार, उपप्रमुख निराजन जंगम, धुलिखेल वडा नम्बर १२ का अध्यक्ष मोहन प्रसाद लामिछाने, वडा सचिव राजबहादुर धरला, विभिन्न विद्यालयका प्रधानाध्यापक, सहकारी संस्थाका प्रतिनिधि, स्थानीय जनप्रतिनिधिहरू तथा पत्रकारहरूको उल्लेखनीय उपस्थिति रहेको थियो।

सांस्कृतिक कार्यक्रमको विशेषता

सोनाम ल्होछारको अवसरमा तामाङ समुदायको मौलिक सांस्कृतिक प्रस्तुति विशेष आकर्षण बनेको थियो। डम्फु नाच, झाँक्री नाच, लामा गुरुहरूको धार्मिक भजन तथा सांस्कृतिक झल्कोले कार्यक्रमलाई झनै मनोरम बनायो।

कार्यक्रममा गायकहरू बुद्ध लामा, रञ्जित लामा, अस्मिता रुम्बा तामाङ, रोजन थोकोर तामाङ, कोसिस थोक्कर तामाङ, बसन्ती लामा, र अजय रञ्जितले सांगीतिक प्रस्तुति दिएर दर्शकलाई मनोरञ्जन प्रदान गर्नुभयो।

नृत्य कलाकार ममता घिसिङ र मोडेलहरू रेक्सम वाइबा लामा, पाल्देन लामा, र निरमाला मोक्तानको आकर्षक प्रस्तुति विशेष चर्चा र प्रशंसा पाउन सफल भयो।
कार्यक्रमको उद्घोषण शिवक्षा शान्ति वाइबाले प्रभावकारी रूपमा गर्नुभएको थियो

मौलिक खानपानको प्रस्तुति

कार्यक्रममा तामाङ समुदायको मौलिक परिकारहरूको विशेष प्रदर्शन गरिएको थियो। सहभागीहरूले यी परिकारहरूको स्वाद लिँदै सांस्कृतिक कार्यक्रमको रमाइलो वातावरणमा सामेल भए।

स्वागत र समापन मन्तव्य

कार्यक्रमका सभापति तथा संयोजक हर्कबहादुर तामाङले सोनाम ल्होछारको महत्वलाई जोड दिँदै समुदायको एकता र सांस्कृतिक पहिचानलाई सुदृढ बनाउन यस्ता कार्यक्रमको निरन्तरता आवश्यक रहेको बताउनुभयो।

शान्ति बुद्ध छोर्वा समाज धुलिखेल-१२ का अध्यक्ष बुद्ध तामाङले स्वागत मन्तव्य राख्दै समुदायका सम्पूर्ण सदस्यहरूको योगदानप्रति धन्यवाद व्यक्त गर्नुभयो।

समाजको एकता र पहिचानको उत्सव

कार्यक्रममा स्थानीय जनसमुदाय, विद्यालयका विद्यार्थीहरू, सहकारी संस्थाका प्रतिनिधिहरू, सुरक्षाकर्मीहरू र विभिन्न संघसंस्थाका प्रतिनिधिहरूको बाक्लो उपस्थिति रहेको थियो।

कार्यक्रमको अन्त्यमा समुदायले एकआपसमा शुभकामना आदानप्रदान गर्दै सोनाम ल्होछारको उल्लासमय वातावरणलाई थप स्मरणीय बनाएको थियो।
थाङ्मीचागु डटकम, धुलिखेल।