जेन जी युनाइटेड परिवर्तन समूहद्वारा सहिदप्रति श्रद्धाञ्जलीसहित सामूहिक भाइटीका

भाङमिचागु डटकम संवाददाता

कार्तिक ७, काठमाडौं

जेन जी युनाइटेड परिवर्तन समूहले यस वर्षको भाइटीका पर्व विशेष शैलीमा मनाएको छ । समूहले देशका सहिदप्रति श्रद्धाञ्जली अर्पण गर्दै सामूहिक रूपमा भाइटीका कार्यक्रम सम्पन्न गरेको हो ।

कार्यक्रमको सुरुवातमा समूहका सदस्यहरूले देशका लागि बलिदान दिने वीर सहिदहरूलाई सम्झना गर्दै मौनधारण गरी श्रद्धाञ्जली व्यक्त गरे । त्यसपछि सहभागी सदस्यहरूले आपसमा भाइटीका लगाउँदै शुभकामना साटासाट गरेका थिए ।

कार्यक्रमका क्रममा वक्ताहरूले “सहिदहरूको बलिदानबाट प्राप्त लोकतन्त्र र स्वतन्त्रता जोगाउने हाम्रो जिम्मेवारी हो” भन्दै युवा पुस्तालाई एकता, परिवर्तन र सकारात्मक सोचको बाटोमा अघि बढ्न आह्वान गरेका थिए ।

जेन जी युनाइटेड परिवर्तन समूहले विगत केही वर्षदेखि सामाजिक सचेतना, युवाको नेतृत्व विकास र देशभक्तिपूर्ण गतिविधिमा निरन्तर सक्रिय भूमिका निर्वाह गर्दै आएको छ ।