लिम्बुवान आन्दोलन: माघ २० र २१ मा बन्द, अनिश्चितकालीन हड्तालको चेतावनी

थाङ्मीचागु डट कम विशेष समाचार
मिति: २०८१ माघ २०

ताप्लेजुङ, पाँचथर, इलाम, झापा, मोरङ, सुनसरी, धनकुटा, तेह्रथुम र संखुवासभा जिल्लामा लिम्बुवान आन्दोलनकारीहरूले माघ २० र २१ मा बन्दको घोषणा गरेका छन्। नेपाल जनमुक्ति पार्टी प्रदेश नम्बर १ का उपाध्यक्ष राखी नेवाङज्यूले थाङ्मीचागु डट कमलाई जानकारी दिँदै यो आन्दोलनले क्षेत्रीय पहिचान, भूमि अधिकार, र केवलकार खारेज जस्ता महत्वपूर्ण मुद्दाहरूमा सरकारलाई दबाब दिने बताउनुभयो।

अनिश्चितकालीन हड्तालको चेतावनी

राखी नेवाङज्यूका अनुसार माघ २१ सम्म पनि आन्दोलनकारीहरूको माग सम्बोधन नभए माघ २२ गतेदेखि अनिश्चितकालीन आमहड्तालको घोषणा गरिनेछ।

मुख्य मागहरू:

1. केवलकार खारेजी: नाम्जागे काफ्लेपाटिमा निर्माणाधीन केवलकार तत्काल खारेज गर्नुपर्ने।
2. सशस्त्र प्रहरी फिर्ता: नाम्जागे काफ्लेपाटिबाट सशस्त्र प्रहरी फिर्ता गरिनुपर्ने।
3. घाइतेहरूको जीवन व्यवस्थापन: केवलकार सञ्चालक चन्द्र ढकालले गोली लागेका घाइतेहरूको आजीवन व्यवस्थापन गर्नुपर्ने।

ग्लोबल आइएमई बैंक बन्दको घोषणा

भू माफिया आरोपित भनिएका चन्द्र ढकालको ग्लोबल आइएमई बैंकलाई माघ २० गतेदेखि बन्द गरिने चेतावनीसमेत राखी नेवाङज्यूले दिनुभएको छ।

आन्दोलनलाई अन्य संघ-संस्थाहरूको समर्थन

मुक्कुमलुङ संरक्षण समूह, केवलकार खारेजी अभियानका विभिन्न संस्था, र राजनीतिक दलहरूले आन्दोलनमा समर्थन जनाएका छन्।

सरकारलाई अपिल

राखी नेवाङज्यूले सरकारलाई आन्दोलनकारीहरूको जायज माग तत्काल सम्बोधन गर्न आग्रह गर्दै अन्यथा आन्दोलन थप उग्र हुने चेतावनी दिनुभयो।

थाङ्मीचागु डट कमले यस घटनाक्रमबारे थप विवरण संकलन गरिरहेको छ।