दक्षिण सुडानमा हालै आएको विनाशकारी बाढीका कारण लगभग १४ लाख मानिस प्रभावित भएका छन्, जसमा तीन लाख ७९ हजारभन्दा बढी मानिसहरू विस्थापित भएका छन्।

थाङमिचागु डटकम संवाददाता

यो प्राकृतिक प्रकोप, विशेष गरी उत्तरी क्षेत्रमा, दशकौं यताकै सबैभन्दा खराब बाढीको रूपमा मानिएको छ। यसले विश्वको ‘कान्छो देश’ दक्षिण सुडानलाई जलवायु परिवर्तनको उच्च जोखिममा राखेको छ।

संयुक्त राष्ट्रसङ्घीय मानवीय मामिला समन्वय कार्यालय (ओसिएचए) का अनुसार बाढीबाट दक्षिण सुडानका २२ वटा काउन्टी र सुडानसँग विवादित अबेई क्षेत्रका बासिन्दाहरूमा प्रत्यक्ष असर परेको छ। यस बाढीले स्वास्थ्य प्रणालीलाई ठूलो असर पुर्याएको छ, साथै बाढी प्रभावित क्षेत्रमा औलोको प्रकोप समेत बढाएको रिपोर्ट गरिएको छ।

यस बाढीले दक्षिण सुडानमा विभिन्न संरचनात्मक र सामाजिक क्षेत्रहरूमा ठूलो क्षति पुर्‍याएको छ। विशेष गरी, प्रभावित क्षेत्रमा रहेका अस्पताल र स्वास्थ्य केन्द्रहरूमा थप समस्या उत्पन्न भएको छ, जसका कारण बिरामीहरूलाई आवश्यक उपचारमा कठिनाइ भइरहेको छ। खानेपानी, सरसफाइ, र सुरक्षित आवासको अभावले मानिसहरूको जीवनस्तरमा गम्भीर असर परेको छ।

यस्तै, बाढी प्रभावित क्षेत्रमा फसल र पशुधनमा समेत ठूलो क्षति पुगेको छ, जसले खाद्यान्न संकटको जोखिम बढाएको छ। साथै, कच्ची सडकहरू तथा यातायातका साधनमा पनि क्षति पुगेकाले राहत सामग्रीहरू प्रभावित स्थानहरूमा पुर्‍याउन समेत कठिनाइ भइरहेको छ। मानवीय सहायता संस्था र राष्ट्रसङ्घीय निकायहरूले तत्काल राहत र पुनःस्थापना कार्यलाई प्रभावकारी बनाउन अपिल गरेका छन्।