इराकबाट फर्किएका २०३ नेपालीले पाए श्रम स्वीकृति, लाखौं रुपैयाँ बचत

काठमाडौं । इराकबाट फर्किएका नेपाली श्रमिकहरूको श्रम स्वीकृति खुलाउने विषयमा लामो समयदेखि भइरहेको पहलले सफलता पाएपछि हालसम्म २०३ जनाले श्रम स्वीकृति प्राप्त गरेका छन्। यस प्रक्रियामा गैरआवासीय नेपाली संघ (NRNA) इराकका अध्यक्ष बिनोद श्रेष्ठले निरन्तर रूपमा सम्बन्धित निकायसँग पहल गर्दै आएका थिए।

गत पुस ११ गतेको मन्त्रिपरिषद् बैठकले इराकबाट फर्किएका नेपाली नागरिकका लागि श्रम स्वीकृति खुला गर्ने निर्णय गरेको थियो। उक्त निर्णयपछि वैदेशिक रोजगार विभागको तथ्याङ्कअनुसार असार महिनासम्म ७ महिलासहित २०३ जनाले श्रम स्वीकृति प्राप्त गरिसकेका छन्।

यससँगै श्रम स्वीकृतिका नाममा अनावश्यक रूपमा खर्च हुने भनिएको प्रति व्यक्ति करिब एक लाख रुपैयाँसम्मको रकम बचत भएको दाबी गरिएको छ। यसबाट श्रमिकहरूलाई ठूलो आर्थिक राहत पुगेको बताइएको छ।

NRNA इराकका अध्यक्ष बिनोद श्रेष्ठले श्रम स्वीकृति खुलाउनु मात्र अन्तिम उपलब्धि नभएको उल्लेख गर्दै अझै पनि इराकमा कार्यरत **घरेलु कामदार (Domestic Workers)**को हकमा विभेदपूर्ण व्यवस्था कायम रहेकाले त्यसको समाधानका लागि सम्बन्धित निकायसँग निरन्तर पहल जारी रहने बताएका छन्।

उहाँले श्रमिकहरूलाई आवश्यक कागजात पूरा गरेर मात्र श्रम स्वीकृतिको प्रक्रिया अघि बढाउन आग्रह गर्दै भन्नुभयो, “हाम्रो दायित्व सहजीकरण गर्नु हो। आवश्यक कागजात पूरा गर्नु सम्बन्धित सेवाग्राहीको जिम्मेवारी हो। कागजात नपुग्दा वा श्रम स्वीकृति हुन नसक्दा हामीमाथि आक्रोश नपोखिदिनुहोस्।”

इराकमा रहेका तथा फर्किएका नेपाली श्रमिकहरूको अधिकार, सुरक्षित वैदेशिक रोजगारी र श्रम स्वीकृतिसम्बन्धी बाँकी समस्याको समाधानका लागि आगामी दिनमा पनि पहल निरन्तर जारी रहने जनाइएको छ।