फागुन २१ प्रतिनिधि सभा सदस्य निर्वाचनको तयारी: भक्तपुरमा नमुना मतपत्र छपाइँ सुरु

थाङमिचागु डटकम संवाददाता

भक्तपुर — फागुन २१ गते हुने प्रतिनिधि सभा सदस्य निर्वाचनको तयारीको क्रममा जनक शिक्षा सामाग्री लिमिटेड, भक्तपुरमा नमुना मतपत्र छपाइँ सुरु गरिएको छ। निर्वाचन तयारी अन्तर्गत भएको यो काममा कर्मचारीहरू सक्रिय रूपमा संलग्न छन्।

निर्वाचन आयोगका अधिकारीहरूले बताएअनुसार, नमुना मतपत्र छापिने प्रक्रिया मतदानको पारदर्शिता सुनिश्चित गर्ने, मतदातालाई मतदान प्रक्रियासँग परिचित गराउने र सम्भावित त्रुटि पहिचान गर्ने उद्देश्यले सञ्चालन गरिएको हो। यसरी परीक्षणपछि मात्रै वास्तविक मतपत्र वितरण र मतदान तयारी सुरु हुनेछ।

यसका साथै, मतपत्र छपाइसँगै मतदाता शिक्षा, मतदान स्थापन, सुरक्षा व्यवस्था र कर्मचारी तालिमजस्ता तयारीका अन्य चरणहरू पनि तीव्र रूपमा अगाडि बढाइरहेको निर्वाचन आयोगले जनाएको छ।

निर्वाचन आयोगले आगामी प्रतिनिधि सभा निर्वाचन सुरक्षित, निष्पक्ष र पारदर्शी बनाउनको लागि सम्पूर्ण तयारी पूरा गर्ने सुनिश्चितता पनि जनाएको छ।