दोलखाका सिडिओ भोला दाहालको दुई महिनामै सरुवा

थाङमिचागु डटकम संवाददाता

दोलखा, कार्तिक ९ – दोलखाका प्रमुख जिल्ला अधिकारी (सिडिओ) भोला दाहालको दुई महिना नपुग्दै फेरि सरुवा भएको छ । गृह मन्त्रालयले आइतबार २५ जिल्लाका प्रमुख जिल्ला अधिकारीसहित ३६ जना सहसचिवहरूको सरुवा गरेको हो ।

मन्त्रालयको निर्णयअनुसार दोलखाका सिडिओ दाहाललाई पर्सा जिल्लामा सरुवा गरिएको छ । दाहाल भदौ दोस्रो साता मात्रै सप्तरीबाट दोलखा आएका थिए । दुई महिना नपुग्दै उनी पुनः सरुवा भएपछि जिल्लामा चर्चा र प्रतिक्रिया समेत सुरु भएको छ ।

दाहालको स्थानमा अब नारायण प्रसाद रिसाल दोलखाका नयाँ प्रमुख जिल्ला अधिकारीका रूपमा आउने भएका छन् ।
गृहमन्त्री ओमप्रकाश अर्यालको अध्यक्षतामा आइतबार बसेको बैठकले सहसचिवहरूबीचको नियमित सरुवा निर्णय गरेको मन्त्रालयले जनाएको छ ।

दोलखाजस्तो भौगोलिक, प्रशासनिक र विकासीय हिसाबले संवेदनशील जिल्लामा बारम्बार सिडिओ परिवर्तन हुनु स्थानीय प्रशासनिक स्थायित्वका लागि चुनौती मानिएको छ ।