रामेछाप सिन्धुलीको सुनकोशी गाँउपालिका विद्यालय जान जोखिम मोलेर झोलुङ्गे पुल तर्दै विद्यार्थी

थाङमिचागु डटकम संवाददाता

रामेछापको खाँडादेवी गाउँपालिका वडा नं ४ र सिन्धुलीको सुनकोशी गाउँपालिका वडा नं ६ चैनपुरलाई जोड्ने पुछिघाटको झोलुङ्गे पुल अहिले जोखिमपूर्ण अवस्थामा छ। गत असोज १०, ११ र १२ गतेको अविरल वर्षाका कारण सुनकोशी नदीमा आएको बाढीले पुललाई क्षति पुर्‍याएपछि विद्यार्थी र किसानहरूलाई दैनिक आवतजावतमा थप जोखिम व्यहोर्नुपरेको छ।

सिन्धुलीको खल्टेमा रहेको दीर्घ प्रदिम माध्यमिक विद्यालयमा कक्षा ६ देखि १२ सम्म अध्ययन गर्ने २८ जना विद्यार्थी यही पुलबाट आवतजावत गरिरहेका छन्। त्यसैगरी, किसानहरूले पनि पाकेको धानबाली भित्र्याउन यसै पुलको प्रयोग गर्नुपरेको छ।

पुलको मर्मत र विकल्पको अभावले गर्दा स्थानीय बासिन्दा र विद्यार्थीहरूले ज्यान जोखिममा राखेर आवतजावत गर्न बाध्य छन्। यस समस्याको समाधानका लागि सम्बन्धित निकायले शीघ्र कदम चाल्नुपर्ने स्थानीयहरूको माग छ।