२२ तारिखको दशैं, तिहार, छठ कार्यक्रम एनआरएनए मलेसियाको आधिकारिक होइन : एनआरएनए मलेसिया

बिहिवार ३ असोज २०८१

सेप्टेम्बर २२ तारिखका लागि एनआरएनए मलेसिया शाखाको नाममा दशैं, तिहार, र छठ कार्यक्रम भन्दै निमन्त्रणा बाडिएपछि संस्थाले विज्ञप्ति जारी गर्दै उक्त कार्यक्रमलाई आधिकारिक नभएको जानकारी दिएको छ। एनआरएनए मलेसियाका महासचिव टिकाराम अधिकारी र बरिष्ठ उपाध्यक्ष इन्द्रनारायण लिम्बुको हस्ताक्षरयुक्त विज्ञप्तिमा संस्थाको तर्फबाट औपचारिक रूपमा कुनै कार्यक्रम आयोजना नभएको स्पष्ट पारिएको छ।

विज्ञप्तिमा भनिएको छ, “गैरआवासीय मलेसिया शाखाका कार्यकारी अध्यक्ष श्री बिनोद बहादुर थापाको व्हाट्सएप मार्फत कार्यसमितिमा आएको राजीनामा पछि संस्थामा पछिल्लो समय देखिएका घटनाक्रमहरूलाई सम्बोधन गर्न चाहन्छौं।” अध्यक्ष थापाले राजीनामा दिएको भए पनि, उक्त राजीनामा स्वीकृत भइनसकेको र नयाँ अध्यक्ष चयन गर्नका लागि दुई तिहाइ समर्थन नपुगेको अवस्थामा संगठनका कुनै बैठकहरूलाई मान्यता नदिइने उल्लेख छ।

यसअघि, सेप्टेम्बर ७, २०२४ मा जारी प्रेस विज्ञप्तिमा पनि संस्थाले यो प्रक्रिया अझै पूरा नभएको र कार्यकारी अध्यक्षको पद स्वघोषित रूपमा हत्याउने प्रयासहरूको विरोध गरिएको थियो। तथापि, आरके महतो पक्षधरहरूले संस्थाको आधिकारिक प्रक्रिया पालना नगरी २२ तारिखका लागि विभिन्न व्यक्तित्वहरूलाई सम्मान तथा दशैं, तिहार, छठ कार्यक्रमको निम्तो दिएर छलफल बाहिरको गतिविधि गरिरहेको एनआरएनए मलेसियाले आरोप लगाएको छ।

विज्ञप्तिमा थप भनिएको छ, “हामी हाम्रो संगठनात्मक दिशानिर्देश र सिद्धान्तहरू पालना गर्न प्रतिबद्ध छौं, र यो संक्रमणकालीन अवधिमा तपाईंहरूको समर्थनको कदर गर्छौं।” एनआरएनए मलेसियाले अन्य संघ-संस्था, सरकारी अधिकारी, बुद्धिजीवी, र सामाजिक कार्यकर्ताहरूलाई पनि उक्त कार्यक्रमको बैधता सम्बन्धमा सचेत रहन आग्रह गरेको छ।

यता, आरके महतो पक्षधर समूहले भने २२ सेप्टेम्बरका दिन आयोजित कार्यक्रमलाई वैधता दिएको छ र संस्थाका सदस्यहरूलाई सहभागिता जनाउन आह्वान गरिरहेको छ। यो अवस्थालाई लिएर एनआरएनए मलेसियाभित्र विवाद उत्पन्न भएको छ। एक पदाधिकारीका अनुसार, “यो हाम्रो संस्था भित्रको आन्तरिक समस्या हो, बाहिरबाट मान्छे आएर बोल्नु जरुरी छैन। हामी छलफल गरेर, मिलेर अगाडि बढ्छौं।”

समग्रमा, एनआरएनए मलेसियामा नेतृत्व परिवर्तन र आन्तरिक विवादका कारण उत्पन्न असमझदारीले संस्था विभाजनको अवस्था सिर्जना गरेको देखिन्छ, तर दुवै पक्षले छलफल र सहमतिको बाटोबाट समाधान खोज्न प्रयासरत रहेको बताएका छन्।