लुम्बिनीमा एमाले संसदीय दलको नेतामा मुख्यमन्त्री आचार्य चयन

थाङमिचागु डटकम संवाददाता

एमाले संसदीय दलको नेतामा चयन चेतनारायण आचार्य (ढाकाटोपीमा)
१ भदौ,बुटवल । नेकपा एमालेको लुम्बिनी प्रदेश सभा संसदीय दलको नेतामा मुख्यमन्त्री चेतनारायण आचार्य चयन भएका छन् । बुटवलस्थित मुख्यमन्त्रीको निवासमा प्रदेश इन्चार्ज पद्‍मा अर्यालको प्रमुख आतिथ्यतामा शनिबार बसेको संसदीय दलको वैठकले यसअघि उपनेता रहेका आचार्यलाई नेता चयन गरेको हो ।

यस्तै उपनेतामा भोजप्रसाद श्रेष्ठ चयन भएका छन् । दल नेता भएपछि आचार्यले प्रमुख सचेतकमा तुल्सीप्रसाद चौधरी र सचेतकमा यमुना रोका तामाङलाई नियुक्त गरेका छन् । चौधरी यसअघि पनि प्रमुख सचेतक थिए । सचेतकमा भने दाङकी रेखाकुमारी शर्मा थिइन् ।

यसअघिका संसदीय दलका नेता लीला गिरीले आफू दलको नेता हुँदाहुँदै पार्टी महासचिव शंकर पोखरेल निकटका आचार्यलाई मुख्यमन्त्री बनाएपछि असन्तुष्टि जनाउँदै राजीनामा दिएका दिए ।

मुख्यमन्त्रीका लागि दावी पेश गर्न निवेदन तयार गरिरहेका बेला पार्टी महासचिव शंकर पोखरेलले गिरीको ठाउँमा आचार्यको नाम लेख्न भनेपछि गिरी रुष्ट भएर प्रदेश प्रमुखको कार्यालयमा नगई घर फर्केका थिए । गिरी शनिबारको संसदीय दलको वैठकमा उपस्थित भएनन् ।

गिरीले संसदीय परम्परा, विधि र प्रक्रिया मिचेर मुख्यमन्त्री चयन भएको भन्दै पार्टी अध्यक्ष केपी शर्मा ओलीसंग तत्काल असन्तुष्टि पोख्दै दलको नेताबाट राजीनामा दिएको पत्र पठाएका थिए ।

दलको उपनेता चयन भएका भोजप्रसाद श्रेष्ठले सर्वसम्मतरुमा दलको नेता, उपनेता चयन भएका र प्रमुख सचेतक र सचेतक नियुक्ति पनि सहमतिमै भएको बताए ।