थाङमिचागु चरिकोट दोलखा
थाङमिचागु डटकम संवाददाता

दोलखा । दोलखाको बिगु गाउँपालिका–८ स्थित हिमालय माध्यमिक विद्यालयमा शिक्षकहरूबीचको आन्तरिक द्वन्द्वका कारण विद्यालयको शैक्षिक वातावरण प्रभावित भएको भन्दै अभिभावकहरूले गम्भीर चिन्ता व्यक्त गरेका छन्।

विद्यालयमा केही शिक्षकबीचको विवादका कारण नियमित पठनपाठन तथा विद्यालयको व्यवस्थापन प्रभावित भएको अभिभावकहरूको आरोप छ। शिक्षकहरूबीचको विवादले विद्यार्थीको पढाइमा प्रत्यक्ष असर परेको भन्दै अभिभावकहरूले विद्यालय प्रशासन र सम्बन्धित निकायको ध्यानाकर्षण गराएका छन्।

विद्यालय व्यवस्थापन समितिले शिक्षकहरूबीच देखिएको विवाद समाधानका लागि पहल गर्दै आए पनि समस्या पूर्णरूपमा समाधान हुन नसकेको बताइएको छ। केही शिक्षकले विद्यालयको प्रशासनिक जिम्मेवारी तथा पठनपाठनमा अपेक्षित भूमिका निर्वाह नगरेको आरोपसमेत अभिभावकहरूले लगाएका छन्।

बिगु गाउँपालिकाको शिक्षा शाखाले विद्यालयमा देखिएको समस्या समाधानका लागि पहल गरिरहेको जनाएको छ। शिक्षा शाखाका अनुसार विद्यालय व्यवस्थापन समितिको सिफारिसका आधारमा प्रधानाध्यापक छनोट गरी नियुक्तिका लागि विज्ञापनसमेत गरिएको थियो। तर, यस विषयमा पनि विद्यालयभित्र विवाद देखिएको जनाइएको छ।

अभिभावकहरूले केही शिक्षकले समयमा कक्षामा नजाने, कक्षाकोठामा ढिलो पुग्ने तथा विद्यार्थीमाथि मानसिक दबाब पर्ने गतिविधि गर्ने गरेको आरोप लगाएका छन्। यस्ता गतिविधिले विद्यार्थीको शैक्षिक भविष्यमा नकारात्मक असर पर्न सक्ने भन्दै उनीहरूले तत्काल समस्या समाधान गर्न माग गरेका छन्।

विद्यालय व्यवस्थापन समितिका एक सदस्यका अनुसार विद्यालयमा कमाइभन्दा बढी बस्ने शिक्षक तथा शिक्षकहरूबीचको आपसी विवादका कारण समस्या थप जटिल बन्दै गएको छ। विद्यालयमा कार्यरत शिक्षकहरूमध्ये केहीले प्रधानाध्यापकको जिम्मेवारी सम्हालेर प्रशासनिक काम अघि बढाउने तथा आफ्नो कार्यसम्पादनमा निरन्तरता दिने विषयमा समेत विवाद देखिएको बताइएको छ।

अभिभावकहरूले विद्यालयको शैक्षिक वातावरण सुधार गर्दै विद्यार्थीको पढाइलाई पहिलो प्राथमिकतामा राख्न माग गरेका छन्। उनीहरूले शिक्षकहरूबीचको विवाद तत्काल अन्त्य गरी विद्यालयमा नियमित, मर्यादित र प्रभावकारी पठनपाठनको वातावरण बनाउन गाउँपालिका तथा शिक्षा शाखासँग आग्रह गरेका छन्।

सम्बन्धित पक्षले विद्यालयको समस्या समाधान गरी विद्यार्थीको पठनपाठनमा कुनै असर नपर्ने वातावरण बनाउन आवश्यक कदम चाल्नुपर्ने अभिभावकहरूको भनाइ छ।