थाङमिचाग चरिकोट दोलखा
थाङमिचागु डटकम संवाददाता

रुपन्देहीको रोहिणी गाउँपालिकामा लामो समयदेखि भूमिसम्बन्धी समस्या झेल्दै आएका २७१ परिवारले ५८ वर्षपछि जग्गाधनी प्रमाणपुर्जा (लालपुर्जा) प्राप्त गरेका छन्।

भूमिहीन, सुकुम्बासी तथा अव्यवस्थित बसोबासको समस्यामा रहेका परिवारले लामो प्रतीक्षापछि लालपुर्जा पाएसँगै स्थानीयवासीमा खुसी छाएको छ। लालपुर्जा प्राप्त भएपछि उनीहरूले आफ्नो जग्गामाथि कानुनी स्वामित्व स्थापित गर्न पाउनुका साथै राज्यबाट उपलब्ध हुने विभिन्न सेवा तथा सुविधामा पहुँचसमेत सहज हुने अपेक्षा गरिएको छ।

लालपुर्जा वितरणलाई भूमिसम्बन्धी समस्या समाधानका दिशामा महत्वपूर्ण उपलब्धिका रूपमा लिइएको छ। यद्यपि गाउँपालिकामा अझै पनि भूमिहीन, सुकुम्बासी तथा अव्यवस्थित बसोबासीका समस्या बाँकी रहेकाले ती समस्या पनि शीघ्र समाधान गर्नुपर्ने सरोकारवालाहरूले बताएका छन्।

भूमिसम्बन्धी बाँकी समस्या समाधानका लागि स्थानीय, प्रदेश र संघीय सरकारबीच प्रभावकारी समन्वय र निरन्तर प्रतिबद्धता आवश्यक रहेको उनीहरूको भनाइ छ। जनताको वर्षौँदेखिको समस्या समाधान गर्ने विषयलाई राजनीतिक प्रतिशोध वा दलगत स्वार्थभन्दा माथि राखेर अघि बढाउनुपर्नेमा समेत जोड दिइएको छ।

सरोकारवालाहरूले भूमिसम्बन्धी समस्या समाधानसँगै गरिबी, बेरोजगारी तथा पछौटेपन न्यूनीकरणका लागि राजनीतिक दलहरूबीच स्वस्थ प्रतिस्पर्धा, सहकार्य र जनमुखी कार्यशैली आवश्यक रहेको बताएका छन्।

लामो समयदेखि समाधान हुन नसकेका भूमिसम्बन्धी समस्या क्रमशः समाधान गर्दै नागरिकलाई सुरक्षित आवास र जग्गाको कानुनी स्वामित्व सुनिश्चित गर्न राज्यका सबै तहबीच निरन्तर सहकार्य आवश्यक रहेको उनीहरूको भनाइ छ।