थाङमिचागु चरिकोट दोलखा
थाङमिचागु डटकम संवाददाता

सिराहा जिल्लामा यतिबेला ओल (तरुल) निकाल्ने मौसम सुरु भएसँगै किसानहरू खेतबारीमा व्यस्त भएका छन् । जिल्लाका विभिन्न क्षेत्रमा किसानहरू पाकेको ओल खन्ने र बजार पठाउने काममा जुटेका छन् ।

सिराहाका किसान बजराज महतो पनि आफ्नो बारीमा उत्पादित ओल निकाल्न व्यस्त छन् । महतोका अनुसार ओल खेती तुलनात्मक रूपमा कम लागतमा गर्न सकिने र उत्पादन राम्रो हुने भएकाले पछिल्ला वर्षहरूमा किसानको आकर्षण बढ्दै गएको छ ।

ओल खेतीबाट राम्रो आम्दानी लिन सकिन्छ । उत्पादन भएपछि बजारको पनि समस्या हुँदैन,” किसान महतोले भने, “यसले किसानका लागि आम्दानीको भरपर्दो आधार बन्दै गएको छ ।

अहिले किसानले बारीबाट निकालिरहेको ओल स्थानीय बजारमा बिक्री गर्नुका साथै सिराहा आसपासका जिल्लामा समेत पठाउने गरेका छन् । मागअनुसार बजारमा ओलको बिक्री हुने भएकाले किसानले नगदे बालीका रूपमा यसलाई प्राथमिकता दिन थालेका छन् ।

ओल पोषणयुक्त कन्दमूल बालीका रूपमा परिचित छ । यसमा कार्बोहाइड्रेट, फाइबर तथा विभिन्न खनिज तत्त्व पाइने भएकाले यसको उपभोग बढ्दै गएको किसानहरू बताउँछन् । विशेषगरी ग्रामीण तथा सहरी बजारमा ओलको माग रहने गरेको छ ।

कृषि प्राविधिकहरूका अनुसार ओल समयमै निकालेर उचित तरिकाले सफा तथा भण्डारण गर्न सके किसानले राम्रो मूल्य प्राप्त गर्न सक्छन् । आधुनिक खेती प्रविधि, उन्नत बीउ तथा उचित व्यवस्थापन अपनाउन सके उत्पादन र गुणस्तर दुवै बढाउन सकिने उनीहरूको भनाइ छ ।

परम्परागत खेतीसँगै ओलजस्ता नगदे बालीतर्फ किसानको आकर्षण बढ्न थालेपछि सिराहाको ग्रामीण क्षेत्रमा आयआर्जनका अवसरसमेत विस्तार हुँदै गएका छन् । स्थानीयस्तरमै उत्पादन र बिक्री हुने भएकाले ओल खेतीले किसानको आर्थिक आत्मनिर्भरता बढाउन समेत सहयोग पुर्‍याएको छ ।