सिराहामा ओल खन्ने चटारो, किसान बजराज महतो भन्छन्– ‘ओल खेती आम्दानीको भरपर्दो आधार’ ।।।

माया स्याङ्तान,तामाङ, साउन २१ ।
सिराहा जिल्लामा यतिबेला ओल (तरुल) निकाल्ने मौसम सुरु भएसँगै किसानहरू खेतबारीमा व्यस्त बनेका छन् । सिरहाका किसान बजराज महतो पनि आफ्नो बारीबाट ओल निकाल्ने काममा जुटेका छन् ।

महतोका अनुसार ओल खेतीले तुलनात्मक रूपमा कम लागतमा राम्रो उत्पादन र उचित आम्दानी दिने भएकाले पछिल्ला वर्षहरूमा यसको खेतीप्रति किसानहरूको आकर्षण बढ्दै गएको छ । अहिले निकालिएको ओल स्थानीय बजारका साथै आसपासका जिल्लामा समेत बिक्रीका लागि पठाइने गरिएको छ ।
ओल पोषणयुक्त कन्दमूल बालीका रूपमा परिचित छ । यसमा कार्बोहाइड्रेट, फाइबर तथा विभिन्न खनिज तत्त्व प्रशस्त मात्रामा पाइने भएकाले यसको माग वर्षेनी बढ्दै गएको किसानहरू बताउँछन् ।

कृषि प्राविधिकहरूका अनुसार समयमै बाली निकालेर उचित रूपमा भण्डारण गर्न सके बजार मूल्य राम्रो पाइने र किसानले थप लाभ लिन सक्नेछन्। साथै, आधुनिक खेती प्रविधि अपनाए उत्पादन र गुणस्तर दुवैमा सुधार आउने विश्वास गरिएको छ ।

सिराहाका किसानहरूले परम्परागत खेतीसँगै ओलजस्ता नगदे तरकारी बालीलाई प्राथमिकता दिन थालेपछि ग्रामीण क्षेत्रमा आयआर्जन र आत्मनिर्भरता बढाउन समेत सहयोग पुगेको छ ।