दोलखामा युवकको शव फेला

थाङमिचागु डटकम संवाददाता

दोलखा — दोलखाको कालिन्चोक गाउँपालिका–२ स्थित सिंगटी हाइड्रोपावरको सोरुम खोला ड्याममा एक युवकको शव फेला परेको छ।

बिगु गाउँपालिका–५ चिलंखाका २१ वर्षीय राजु तामाङ भदौ ४ गते बिहान माछा मार्न घरबाट निस्केका थिए। तर साँझसम्म घर नफर्किएपछि परिवारले खोजी थालेका थिए।

भदौ ५ गते बिहान करिब १०:३० बजे सिंगटी हाइड्रोपावरका कर्मचारी राजिव थामीले ड्याममा शव देखेपछि प्रहरीलाई खबर गरेका थिए। तत्कालै प्रहरी टोली घटनास्थल पुगेको र अनुसन्धान सुरु गरेको जिल्ला प्रहरी कार्यालयले जनाएको छ।

शवको पहिचान गर्दा मृतक राजु तामाङ भएको पुष्टि भएको छ। प्रहरीका अनुसार प्रारम्भिक अनुसन्धानमा माछा मार्ने क्रममा डुबेर मृत्यु भएको अनुमान गरिएको छ। तर घटनाको वास्तविक कारण पत्ता लगाउन थप अनुसन्धान भइरहेको प्रहरीको भनाइ छ।