भिजिट भिसा प्रकरण: स्वतन्त्र आयोग गठनको माग, गृहमन्त्रीको राजीनामा पनि माग

थाङमिचागु डटकम संवाददाता

प्रतिनिधिसभाको बैठकमा राष्ट्रिय स्वतन्त्र पार्टी (रास्वपा) ले भिजिट भिसा प्रकरणमा निष्पक्ष छानबिनका लागि स्वतन्त्र आयोग गठन गर्न माग गरेको छ। साथै, गृहमन्त्री रमेश लेखकको राजीनासमेत माग गरिएको छ।

रास्वपाका सांसद शिशिर खनाल ले संसदमा वक्तव्य दिंदै भने, “कुनै निकायले प्रमाण जुटाउँदैछ भने उसलाई प्रमाण नष्ट गर्न सरुवा गर्ने ?” उनले प्रहरी अनुसन्धानमा पूर्वाग्रह देखिएको आरोप लगाउँदै अनुसन्धानको दायरा गृहमन्त्रीसम्म विस्तार गर्नुपर्ने माग गरे।

खनालले विगतको नक्कली भुटानी शरणार्थी प्रकरण र रवि लामिछाने प्रकरण उदाहरण दिँदै अनुसन्धान प्रक्रियामा दोहोरो मापदण्ड अपनाइएको आरोप लगाए। उनले भने, “सत्ता पक्षका सांसदलाई चिया खुवाएर छाडिन्छ, विपक्षीलाई हिरासतमा राखिन्छ – यस्तोमा निष्पक्ष छानबिन हुने विश्वास कसरी गर्ने ?”

रास्वपाले स्वतन्त्र आयोग गठन नभएसम्म संसद अवरुद्ध गर्ने चेतावनीसमेत दिएको छ।