दिपिनी मार्गमा कालोपत्रे सडक दुई महिनादेखि अलपत्र, स्थानीयले सडक बन्द गरे

थाङमिचागु डटकम संवाददाता

दमक, २०७९/०१/२९ — दमक–५ स्थित दिपिनी मार्गमा ढल निर्माणका लागि भत्काइएको कालोपत्रे सडक दुई महिनासम्म मर्मत नहुँदा स्थानीयवासीले सवारी आवागमन नै बन्द गराएका छन्।

दुई महिना अगाडि ढल निर्माणको काम सुरु गर्न सडक भत्काइए पनि अहिलेसम्म पिच पुनः गरिँदैन, जसका कारण सडकभर खाल्डाखुल्डी, हिलो र धुलोले स्थानीयको दैनिकी कष्टकर बनेको छ। बालबालिका, वृद्धवृद्धा र बिरामीहरू आवागमनमा कठिनाइ भोग्न बाध्य छन्।

स्थानीयको बारम्बारको ध्यानाकर्षणका बाबजुद सम्बन्धित निकायले चासो नदिएको गुनासो छ। अन्ततः आज आक्रोशित स्थानीयले सडकमा अवरोध सिर्जना गर्दै सवारी आवागमन ठप्प पारेका छन्।

स्थानीयवासी अम्बिका भुजेलले भनिन्, “हामीले पटक–पटक नगरपालिका र निर्माण कम्पनीलाई जानकारी गरायौं, तर कसैले सुनुवाइ गरेन। यस कारण आज सडक बन्द गर्नुपर्‍यो।”

यता, दमक नगरपालिकाले निर्माण कम्पनीसँग सम्पर्कमा रहेको र चाँडै मर्मत कार्य सुरु गरिने जनाएको छ। तर स्थलगत अनुगमन र तत्कालीन सुधार नभए जनआन्दोलनमा रूपान्तरण हुने चेतावनी स्थानीयले दिएका छन्।