पहिरोले पुरिएर वृद्धको मृत्यु

थाङमिचागु डटकम संवाददाता

रोल्पाको एक चर्चमा पहिरोले पुरिएर एक वृद्धको मृत्यु भएको छ । रोल्पा नगरपालिका(२ मुलपानीमा रहेको वेथेल मण्डली (चर्च)को माथिबाट आएको पहिरोमा पुरिएर एक वृद्ध महिलाको मृत्यु भएको छ भने एक जना घाइते भएको रोल्पा प्रहरीले जनाएको छ ।

पहिरोमा पुरिएर मृत्यु हुनेमा रोल्पा नगरपालिका १० धाङसीकी ७० वर्षीय धनजिता बुढामगर रहेको जिल्ला प्रहरी कार्यालय रोल्पाका प्रहरी निरीक्षक, सूचना अधिकारी केशवराज बराकोटीले जानकारी दिए । उनका अनुसार पहिरोमा परेर सुनछहरी गाउँपालिका(३ मौलावन कि १८ वर्षीय नौभा घर्तीमगर घाइते भएकी छिन् । घाइते घर्तीमगरको जिल्ला अस्पताल रेउघामा उपचार भइरहेको प्रहरीले जनाएको छ ।

शनिवार रातिदेखि परेको अविरल वर्षाका कारण आईतवार बिहान ४ बजेको समयमा उक्त घटना घटेको प्रहरीले जनाएको छ । उक्त चर्चमा १० जना बस्ने गरेको र अन्य ८ जना सकुशल रहेको बताइएको छ ।