तामाङ समुदायको महान पर्व सोनाम ल्होछार टुडिखेलमा भव्य रूपमा मनाइँदै

काठमाडौं — तामाङ समुदायहरूको महान पर्व मञ्जुश्री संवत् २८६२ (ता ल्हो–घोडा वर्ग) सोनाम ल्होछारको अवसरमा राजधानी काठमाडौंको टुडिखेलमा भव्य तामाङ सांस्कृतिक कार्यक्रम तथा महोत्सव हर्षोल्लासका साथ मनाइँदै छ।

सोनाम ल्होछारको विशेष अवसरमा आयोजित उक्त सांस्कृतिक महोत्सवमा तामाङ समुदायको मौलिक पहिचान झल्काउने भेषभूषा, परम्परागत नृत्य, तामाङ सेलो दम्फु नृत्य तथा विविध सांस्कृतिक प्रस्तुतिले टुडिखेलको वातावरण उत्सवमय बनेको छ। कार्यक्रममा तामाङ संस्कृतिको ऐतिहासिक महत्व, जीवनशैली र सामुदायिक एकताको सन्देशलाई उजागर गरिएको छ।

महोत्सवमा काठमाडौं उपत्यकासहित देशका विभिन्न जिल्लाबाट आएका तामाङ समुदायका सदस्यहरूको उल्लेखनीय सहभागिता रहेको छ। साथै, अन्य समुदायका सर्वसाधारण दर्शकको समेत बाक्लो उपस्थिति देखिएको छ, जसले नेपाली समाजको बहु-सांस्कृतिक एकता र आपसी सद्भावलाई थप सुदृढ बनाएको आयोजक पक्षको भनाइ छ।

आयोजकका अनुसार सोनाम ल्होछार केवल नयाँ वर्षको स्वागत मात्र नभई तामाङ समुदायको भाषा, धर्म, कला, संस्कृति र परम्पराको संरक्षण तथा प्रवर्द्धन गर्ने महत्वपूर्ण अवसर हो। यस प्रकारका कार्यक्रमले युवा पुस्तालाई आफ्नो मौलिक संस्कृतिप्रति जागरूक बनाउनुका साथै राष्ट्रिय सांस्कृतिक पहिचानलाई समेत मजबुत बनाउने विश्वास व्यक्त गरिएको छ।

टुडिखेलमा जारी महोत्सवमा विभिन्न सांस्कृतिक झाँकी, सामूहिक नृत्य, सांगीतिक प्रस्तुति तथा शुभकामना आदान–प्रदान कार्यक्रमहरू सञ्चालन भइरहेका छन्। सोनाम ल्होछारको अवसरमा देशविदेशमा रहेका तामाङ समुदायले पनि आ–आफ्नै ठाउँमा विविध कार्यक्रम गरी पर्व मनाइरहेका छन्।