वडा अध्यक्ष र पत्रकारको पहलमा मागन वस्तीले पायो बहुप्रतीक्षित बाटो

थाङमिचागु डटकम संवाददाता

धनगढीमाई, सिराहा — वर्षौँदेखिको माग गर्दै आएका धनगढीमाई नगरपालिका–१४ अन्तर्गतको मागन वस्तीका बासिन्दाले अन्ततः बहुप्रतीक्षित बाटो पाएका छन्। स्थानीय सरकार र सञ्चारकर्मीको सहकार्यमा सम्भव भएको यो उपलब्धिले वस्तीमा विकासको नयाँ ढोका खोलेको छ।

विकास निर्माणका कामहरू वाचा र प्रस्तावमै सीमित भइरहेका बेला मागन वस्तीमा भने त्यसको अपवाद देखिएको छ। बर्षातको समयमा हिलाम्य र जलमग्न अवस्थाका कारण आवतजावतमा कठिनाइ झेल्दै आएका वस्तीवासीको जीवनस्तरमा प्रतिकूल असर परिरहेको थियो।

वडा अध्यक्ष अमित ठकुरीले समस्या बुझ्न स्वयम् वस्तीमा पुगेर भौतिक सर्वेक्षण गरे। त्यसपछि आफ्नै पहलमा प्राविधिक डिजाइन र योजना तयार पार्दै बाटो निर्माणको खाका अगाडि सारे।

यसै क्रममा पत्रकार बिनोद मण्डलले पनि सामाजिक सञ्जाल, समाचारमाध्यम र सम्बन्धित सरकारी निकायमा निरन्तर आवाज उठाउँदै मागन वस्तीको पीडा उजागर गर्दै आएका थिए। जनताको आवाजलाई बुलन्द बनाउँदै उनले राजनीतिक, प्रशासनिक र सामाजिक तहमा दबाब सिर्जना गरे।

अन्ततः स्थानीय सरकार र सञ्चारकर्मीको समन्वय, जनताको साथ र निरन्तर प्रयासपछि मागन वस्तीमा बाटो निर्माण सम्पन्न भएको हो। बाटो निर्माणसँगै वस्तीमा उत्साह र कृतज्ञता व्यक्त गरिएको छ।

एक स्थानीय बासिन्दाले भने, “हामीले त बाटो पाइन्छ भन्ने आशा गर्नै छोडेका थियौं। अब छोराछोरी स्कूल जान, बिरामीलाई अस्पताल लैजान सजिलो भयो। वडा अध्यक्ष र पत्रकार बिनोदजीलाई धेरै धेरै धन्यवाद।”

यो सफलताले जनप्रतिनिधि र सञ्चारकर्मीबीचको सहकार्यद्वारा कसरी सकारात्मक परिवर्तन सम्भव हुन्छ भन्ने स्पष्ट उदाहरण प्रस्तुत गरेको छ। आगामी दिनमा पनि यस्तै साझा प्रयासमार्फत अन्य समस्याहरू समाधान हुने अपेक्षा गरिएको छ।