दोलखाको तामाकोशी नदीमा हरिबोधनी एकादशीको अवसरमा फूल तार्ने क्रममा एकजना व्यक्ति डुबेर बेपत्ता भएका छन्। मेलुङ गाउँपालिका–१, जामुनेका करिब २२ वर्षीय राजेन्द्र बुढाथोकी बेपत्ता भएका हुन्।

थाङमिचागु डटकम संवाददाता

जिल्ला प्रहरी कार्यालय दोलखाका अनुसार, बुढाथोकी आज बिहान करिब १०:४० बजे तामाकोशी नदीको चैतेघाट क्षेत्रमा एकादशी पूजा लगाएर फूलको डोरी तार्ने क्रममा पौडी खेल्दा डुबेर बेपत्ता भएका थिए।

हाल बुढाथोकीको खोजी कार्य जारी रहेको र घटनास्थलमा प्रहरी टोली परिचालित भएको दोलखा प्रहरीले जानकारी दिएको छ।

तामाकोशी नदीमा हरिबोधनी एकादशीको पूजा सम्पन्न गर्न फूलको डोरी तार्ने धार्मिक परम्पराका क्रममा यो दुखद घटना घटेको हो। स्थानिय बासिन्दाले एकादशीको दिन नदीमा फूल चढाउन र डोरी तार्न विशेष धार्मिक आस्था राख्ने गर्छन्।

राजेन्द्र बुढाथोकी बेपत्ता भएपछि स्थानीय समुदायमा शोक र चिन्ता छाएको छ। घटनापछि स्थानीय बासिन्दा र सुरक्षाकर्मीहरूले खोजीमा सहयोग गरिरहेका छन्। दोलखा प्रहरी र नेपाल प्रहरीका गोताखोर टोली पनि खोजीमा खटिएको छ। नदीको पानीको बहाव र ठण्डीले खोजी कार्यमा कठिनाइ उत्पन्न भइरहेको भए तापनि खोजी कार्यलाई निरन्तरता दिइएको छ।

यस घटनाले धार्मिक कार्यक्रमको क्रममा सुरक्षा मापदण्डलाई पनि ध्यान दिनुपर्ने आवश्यकता औंल्याएको छ। स्थानीय प्रशासनले जोखिमपूर्ण स्थानमा सुरक्षा सतर्कता अपनाउन र सम्भावित जोखिमलाई कम गर्न चेतना फैलाउने अभियान सञ्चालन गर्ने योजना समेत बनाएको छ।