मलेसियामा निजी क्षेत्रमा कामदारको न्यूनतम तलब आरएम १७०० पुर्‍याइने

थाङ्मीचागु डटकम सम्बादाता

शनिबार ३ कार्तिक २०८१

क्वालालम्पुर (मलेसिया), अक्टूबर १९, २०२४ – मलेसियामा निजी क्षेत्रमा कार्यरत सबै कामदारहरूको न्यूनतम तलब (बेसिक तलब) आरएम १७०० पुर्‍याइने भएको छ। मलेसियाका प्रधानमन्त्री र अर्थमन्त्री दातुक श्री अनवर बिन इब्राहिमले अक्टोबर १८ तारिखमा संसदको बैठकमा आगामी आर्थिक वर्षको बजेट भाषणको क्रममा यो घोषणा गर्नुभएको हो।

प्रधानमन्त्रीले वर्तमानमा रहेको आरएम १५०० न्यूनतम तलबमा आरएम २०० थप गरी आरएम १७०० पुर्‍याउने निर्णय सार्वजनिक गर्नुभयो। यो नयाँ व्यवस्था फेब्रुअरी १, २०२५ देखि लागू हुनेछ। गृहमन्त्रालय र श्रम मन्त्रालयको सहकार्यमा सबै रोजगारदाता कम्पनीहरूलाई यो तलब वृद्धि लागू गर्न निर्देशन दिइसकेको जानकारी पनि दिनुभयो।

प्रधानमन्त्री अनवर बिन इब्राहिमले यो निर्णयले मलेसियामा कार्यरत स्थानीय र विदेशी कामदारहरूको आर्थिक सुधारमा मद्दत गर्ने र आफू सधैं कामदारहरूको हितका लागि काम गर्न प्रतिबद्ध रहेको बताउनुभयो।