तनहुँको आबुखैरेनी गाउँपालिका–४ स्थित ऐनापहराबाट मर्स्याङ्दी नदीमा खसेको भारतीय  यात्रुवाहक बसलाई क्रेनको सहायताले नदीबाट १० मिटर बाहिर ल्याइएको छ ।

थाङ्मीचागु डटकम संवाददाता
शनिबार, ०८ भदौ २०८१
काठमाडौँ । तनहुँको आबुखैरेनी गाउँपालिका–४ स्थित ऐनापहराबाट मर्स्याङ्दी नदीमा खसेको भारतीय  यात्रुवाहक बसलाई क्रेनको सहायताले नदीबाट १० मिटर बाहिर ल्याइएको छ ।

शनिवार सशस्त्र प्रहरी बल नेपाल नं. २३ मनकामना गण भानु तनहुँ र बिपद व्यवस्थापन तालिम शिक्षालय कुरिनटारबाट गएको ५२ जनाको सुरक्षा फौजले बस पानी बाहिर निकालेको हो ।  

बस निकाल्नको लागि दमौलीबाट प्राइभेट क्रेन प्रयोग गरिएको थियो । पानीबाट बाहिर निकाले पनि अप्ठ्यारो जमिनका कारण सडक सम्म निकाल्न नसकिएको जिल्ला प्रहरी कार्यालयका डीएसपी शैलेन्द्र थापाले जानकारी दिए । 

आइतबार पनि बस निकाल्ने कार्य जारी रहने थापाले बताए ।  शुक्रबार पोखराबाट काठमाडौँ आउँदै गरेको भारतीय यात्रुवाहक बस दुर्घटना हुँदा २७ जनाको मृत्यु भएको थियो । दुर्घटनामा १६ जना घाइते भएका थिए ।

आज भारतीय एयर फोर्सको जहाजले दुर्घटनामा परेका २५ जना शव लिएर स्वदेश फर्किएको छ भने चालक र सहचालकको शव स्थलमार्गबाट लगिएको छ । घाइतेहरूको त्रिवि शिक्षण अस्पतालमा उपचार भइरहेको छ । 

तनहुँ बस दुर्घटना