दोलखामा सुरु भयो बागमती प्रदेशस्तरीय राष्ट्रपति रनिङशिल्ड प्रतियोगिता

थाङमिचागु डटकम संवाददाता

दोलखा, २०७५ जेठ १८ — बागमती प्रदेशस्तरीय राष्ट्रपति रनिङशिल्ड प्रतियोगिता आजदेखि दोलखाको सदरमुकाम चरिकोटस्थित भीमेश्वर रंगशालामा सुरु भएको छ। नेपाली कांग्रेसका नेता तथा पूर्वउपप्रधानमन्त्री कृष्णप्रसाद सिटौलाको प्रमुख आतिथ्यमा प्रतियोगिता उद्घाटन गरिएको हो।

प्रतियोगिताको उद्घाटन समारोहलाई सम्बोधन गर्दै नेता सिटौलाले संविधानको मौलिक पक्षलाई सम्मान गर्दै अहिलेको संघीय लोकतान्त्रिक गणतन्त्रलाई स्वीकार्ने सबै राजनीतिक दलहरू एकजुट भई राष्ट्र विकासमा लाग्नुपर्ने आवश्यकतामा जोड दिए। उनले मुलुकको अर्थतन्त्र, कृषि, घरेलु तथा बाह्य नीति जस्ता क्षेत्रमा दीर्घकालीन साझा नीति निर्माण गरी जुनसुकै सरकार आए पनि त्यही नीति अनुरूप मुलुक सञ्चालन गर्नुपर्ने विचार व्यक्त गरे।

बागमती प्रदेश खेलकुद विकास परिषद्को आयोजनामा तथा जिल्ला खेलकुद विकास समिति दोलखाको समन्वयमा सुरु भएको प्रतियोगितामा प्रदेशका १३ वटै जिल्लाबाट खेलाडीहरूको सहभागिता रहेको छ। बागमती प्रदेशस्तरीय राष्ट्रपति रनिङशिल्ड प्रतियोगिता पहिलोपटक दोलखामा आयोजना गरिएको हो।

प्रतियोगितामा फुटबल, भलिबल, तेक्वान्दो, कराँते, बक्सिङ, ब्याडमिन्टन लगायतका विभिन्न खेल विधा समावेश गरिएको जिल्ला खेलकुद विकास समिति दोलखाले जानकारी दिएको छ।

खेलकुदमार्फत युवा शक्तिको विकास र सामाजिक एकता सुदृढ गर्नसक्ने विश्वाससहित सुरु भएको यस प्रतियोगिता केही दिनसम्म चल्ने बताइएको छ।