थाङ्मीचागु डटकम सम्बादाता १२ भदौ २०८१

पोखरामा पछिल्लो समयमा स्कुल बस दुर्घटनाहरूको संख्यामा वृद्धि भएको छ, जसले विद्यार्थीहरूको सुरक्षामा चिन्ता थपेको छ। छोरेपाटनमा भएको एक दुर्घटनामा दुई जनाको मृत्यु भएको छ, भने केही दिनअघि घारीपाटनमा स्कुल बस अनियन्त्रित हुँदा चालक घाइते भएका छन्।

यसै कारण ट्राफिक प्रहरीले स्कुल बसहरूमा निगरानी र अनुगमनलाई कडा बनाएको छ। मंगलबार मात्रै, क्षमताभन्दा बढी विद्यार्थी बोकेका १७ वटा स्कुल बसलाई नियन्त्रणमा लिइएको छ। कुल २२३ वटा बसहरूको चेकजाँच गर्दा यी १७ बसले क्षमताभन्दा बढी विद्यार्थी बोकेको पाइयो।

कास्की प्रहरीका प्रवक्ता डीएसपी वसन्तकुमार शर्माका अनुसार, उल्लंघन गर्ने बसहरूलाई ट्राफिक नियम अनुसार कारबाही गरिएको छ। यस अनुगमनमा जिल्ला प्रहरी र ट्राफिक प्रहरीले संयुक्त रुपमा काम गरेका छन्।