१४ साउन, काठमाडौं । नेपाली पत्रकारहरुको अन्तर्राष्ट्रिय सञ्जाल (इन्जा) ले यस वर्षको उत्कृष्ट ‘इन्जा खोजी पत्रकारिता’ पुरस्कार वरिष्ठ पत्रकार गजेन्द्र बुढाथोकीलाई प्रदान गरेको छ ।

कोकाकोलाले नेपालमा कर छलेको विषय पत्रकारिताको माध्यमबाटसम्पे्रषण गरी राज्यलाई सात अर्ब रुपैयाँ कर असुल गर्न सहयोग गरेकाले पुरस्कार प्रदान गरिएको इन्जाले जनाएको छ ।

काठमाडौंमा शनिबार आयोजित इन्जाको पाँचौँ वार्षिकोत्सव समारोहमा सञ्चार तथा सूचना प्रविधिमन्त्री ज्ञानेन्द्रबहादुर कार्कीले एक लाख रुपैयाँ र सम्मानपत्र पत्रकार बुढाथोकीलाई प्रदान गरे ।

त्यसैगरी मन्त्री कार्कीले ‘इन्जा ग्रामीण पत्रकारिता’ पुरस्कार पत्रकारद्वय दीपा कर्ण र सरोज ढुङ्गानालाई, ‘इन्जा बौद्धिक पत्रकारिता’ पुरस्कार उपप्राध्यापक देवराज अर्याल र वरिष्ठ पत्रकार कपिल काफ्लेलाई जनही ५० हजार रुपैयाँ नगद र कदरपत्र प्रदान गरी सम्मान गरे ।

त्यस अवसरमा वरिष्ठ पत्रकारद्वय हरि लम्साल र गोपालचन्द्र शर्मा तथा सञ्चारिका समूहकी निवर्तमान अध्यक्ष नीतु पण्डित पनि सम्मानित भएका छन् ।