हेटौंडा । बागमती प्रदेश सरकारले एक विद्यालय एक नर्स कार्यक्रमका लागि ५० जना स्टार्फ नर्स माग गरेको छ ।

प्रदेश सरकारले दोलखाका तीन सहित प्रदेशका ५० वटा विद्यालयमा ५० जना नर्स माग गरेको हो । दोलखाको शैलुङ गाउँपालिकास्थित शारादा मावि र विरेन्द्र मावि तथा मेलुङ गाउँपालिकाको त्रिभुवन माविका लागि नर्स माग गरिएको छ । मन्त्रालयले आज विज्ञप्ति जारी गर्दै इच्छुक व्यक्तिहरुले जेठ २७ गतेभित्र आफुले काम गर्न चाहेको कम्तीमा ५ वटा स्थानीय तहहरु खुलाई निवेदन पेश गर्न पाउने जानकारी गराएको हो ।

प्रदेश सरकारले सिन्धुपाल्चोकमा सबैभन्दा बढी ११ वटा विद्यालयका लागि नर्स माग गरेको छ भने काभ्रेपलाञ्चोकका चार, रामेछापका दुई वटा विद्यालय तथा सिन्धुलीका चार वटा विद्यालयका लागि स्टाफ नर्स माग गरेकोे छ । यसैगरी धादिङको चार वटा विद्यालय, नुवाकोटको पाँच, काठमाडौंका चार, मकवानपुरका लागि पाँच, भक्तपुरका लागि तीन जना, ललितपुरमा दुई तथा चितवनको एउटा विद्यालयका लागि स्टार्फ नर्स माग गरिएको छ । आवेदन दिन इच्छुक व्यक्तिहरुले प्रत्यक्ष मन्त्रालयमा उपस्थित भई वा इमेल मार्फत पनि आवेदन दिन पाउनेछन् ।