आजकै दिन :  ‘एके–४७’ उत्पादन सुरु 

असार २१, २०८० थाङ्मीचागु टक कम संवाददाता
काठमाडौँ — सन् १९४७ मा आजकै दिन (जुलाई ६) मा ‘एके–४७’ राइफलको उत्पादन सुरु भएको थियो । यो हतियार प्रतिकूल मौसममा पनि  प्रभावकारी मानिन्छ । मिखाइल कलास्निकोभले आविस्कार गरेको राइफल विश्वमा सबैभन्दा बढी प्रयोगमा आएको हतियार हो । यो ग्यासबाट सञ्चालित एसल्ट राइफल हो ।

आधिकारिक नाम ‘अभ्टोमट कलास्निकोभ’ रहेको राइफलको डिजाइन १९४५ मै सुरु गरिएको थियो । त्यसको दुई वर्षपछि उक्त हतियार परीक्षणका लागि सेनाले प्रयोगमा ल्याएको थियो । हालसम्म एके–४७ का करिब १० करोड फरकफरक भर्जन प्रयोगमा आइसकेका छन् ।
रुसको कुर्यामा १९१९ को नोभेम्बर १० मा जन्मिएका कलास्निकोभ एके–४७ बनाएपछि रुसी सरकारबाट सम्मानित भएका थिए । उनको २०१३ को डिसेम्बर २३ मा मृत्यु भएको थियो ।