धरानमा फोहोरबाट उत्पादन भएको ग्याँसले चल्छ टेम्पो, पैसा धेरै बचत भएपछि चालकहरु खुशी

0Shares

धरान: जुन ५, विश्वभर वातावरण दिवस विभिन्न कार्यक्रमहरु गरि मनाइएको छ । यो दिन वातावरण संरक्षण कसरी गर्ने भनेर बहस गर्नुपर्ने भएपनि नेपालमा भने मानिसहरुले नै उत्पादन गरेको फोहोरलाई कसरी व्यवस्थापन गर्ने भन्नेमा नै केन्द्रीत रह्यो ।

आइतबार धरानसहित देशका विभिन्न स्थानहरुमा सडकमा जथाभावी फालिएको फोहोर संकलन गरेर विश्व वातावरण दिवस मनाइयो । काठमाण्डौंका नवनिवार्चित मेयर बालेन साहको पनि प्रमुख चुनौती फोहोर व्यवस्थापन नै देखिएको छ । तर, यता धरानमा भने काठमाण्डौंको जस्तो सहरबाट उत्पादन भएको फोहोर कहाँ लगेर फाल्ने अथवा व्यवस्थापन गर्ने भन्ने चिन्ता छैन ।

धरानमा गत पुष तेस्रो सातादेखि फोहोर प्रशोधन केन्द्र सञ्चालनमा आइसकेको छ । उक्त केन्द्रले धरानको फोहोरलाई प्रशोधन गरेर बायो ग्याँस उत्पादन गरिरहेको छ । फोहोरबाट उत्पादन भएको उक्त ग्याँसले धरानमा अहिले ६ वटा टेम्पो चलिरहेको छ । पेट्रोलले चल्ने टेम्पोमा किट राखेर ग्याँसबाट चल्ने बनाइएको छ । ग्याँसबाट टेम्पो चलाउदा पेट्रोलले चलाएको बेलाभन्दा बढी पैसा बचत भएको भन्दै चालकहरु खुशी छन् ।

नेपाल सरकार, धरान उपमहानगरपालिका र भेञ्चर वेष्ट टु इनर्जी प्रालिबीच ४ बर्षअघि सहरी फोहार प्रशोधन गरेर उर्जा निकाल्ने सम्झौता भएको थियो । सोही सम्झौता वमोजिम कम्पनीले धरान ६ पानवारीमा जग्गा खरीद गरेर प्लान्ट निर्माण गरेको हो । हाल डेढ सय वटा टेम्पोलाई पुग्ने ग्याँस उत्पादन भइरहेको प्रालिका निर्देशक जेनेस श्रेष्ठले जानकारी दिए । उनका अनुसार धेरै टेम्पो चालकहरुले इच्छा जाहेर गरेका छन् । परीक्षणमा राम्रो रिजल्ट आएको र सरकार पनि सकरात्मक बनेकोले अब विस्तारै संख्या बढाउदै लैजाने उनले बताए ।

Leave a Reply

Your email address will not be published. Required fields are marked *